بيشتغل بدون نت؟
آه، لحد 72 ساعة من آخر مرة اتصل فيها. بعدها بيكفيه اتصال واحد وبيكمّل.
كيف برتّب شاشة التطبيقات على السيارة؟
من «القيادة» ← «على شاشة السيارة» اكبس «تعديل» (أو صورة شاشة السيارة الصغيرة)، وبتطلعلك شاشة سيارتك بحجم هاتفك: المس أي تطبيق واسحبه لمكانه، والشارة الحمرا بتشيله، و«+» بأي خانة فاضية بتحطلك التطبيق اللي بدك، وبس يعجبك الشكل اكبس «تثبيت». وبتقدر ترتّبها كمان من زر «تعديل» على شاشة السيارة (شوف الصور).
ما لقيت التطبيق على شاشة السيارة؟
الشرط إنك تكون ركّبته من المثبّت مش بتثبيت مباشر — هاد اللي بيخلّي Android Auto يتعرّف عليه. جرّب افصل ووصّل من جديد، أو اكبس «تحديث» بالمثبّت. التفاصيل بخطوة الربط.
ليش اللمس مش شغّال على شاشة السيارة؟
اللمس بدو تفعيل بإيدك مرة وحدة من «إمكانية الوصول». الخطوات بشاشة اللمس، وبتاخد دقيقة.
التجربة المجانية بتتكرر؟
لا، مرة وحدة لكل رقم هاتف ولكل جهاز. فجرّبه منيح على سيارتك.
طلعتلي رسالة «إعداد مقيّد»؟
هاي حماية من أندرويد 13 وأحدث لأي تطبيق من برّا المتجر. افتح إعدادات الهاتف ← التطبيقات ← JoLink+ ← النقاط الثلاث فوق ← «السماح بالإعدادات المقيّدة»، وارجع فعّل اللي بدك.
غيّرت هاتفي، بدفع من جديد؟
أبداً. سجّل دخول برقمك وكلمة المرور على الهاتف الجديد، واشتراكك بينتقل معك بالأيام الباقية.
نسيت كلمة المرور؟
ولا يهمك: اكبس «إرسال طلب استعادة»، وبعد ما نوافق بتطلعلك خانة تكتب فيها كلمة جديدة.
بقدر أستعمل الاشتراك على هاتفين؟
الاشتراك لهاتف واحد لكل رقم. إذا دخلت من هاتف جديد، بيوقف على القديم.
ليش Netflix بيطلع أسود؟
Netflix وأمثاله بيحموا أفلامهم من أي عرض للشاشة، فبتطلع الصورة سودا والصوت شغّال. هاد منهم، وما في تطبيق بيقدر يتجاوزه.
كيف بجدّد اشتراكي؟
من شاشة الاشتراك اختار المدة واكبس «طلب اشتراك عبر واتساب». الدفع عبر المحافظ الإلكترونية أو خدمة CliQ، واذكر رقم الطلب. والأيام الباقية بتنضاف على الجديد.
حذفت التطبيق ونزّلته من جديد، كيف برجّع بياناتي؟
إذا عامل نسخة احتياطية قبل: أول ما تفتح التطبيق بيسألك «هل استخدمت JoLink+ من قبل؟». اكبس «استرجاع بياناتي»، وبيفتحلك مجلد JoLinkPlus: اكبس «استخدام هذا المجلد» ثم «السماح»، واكتب رمز النسخة. واشتراكك بيرجع لما تسجّل دخول برقمك وكلمة المرور. ولو التطبيق موجود: «حسابي ← البيانات والنسخ الاحتياطي ← استرجاع البيانات». بتشوف النسختين «الأحدث» و«السابقة» وشو بكل وحدة (سيارات ورحلات وسجلات) وبتختار، وبياناتك الحالية بتنحفظ قبل الاسترجاع، وفي زر «تراجع عن آخر استرجاع».
جوجل ما قبلت أسجّل دخول بيوتيوب؟
جوجل بترفض تسجيل الدخول من جوّا التطبيقات على بعض الهواتف، وهاد منها مش منّا. يوتيوب بيضل شغّال على شاشة السيارة عادي بدون حساب، بس بدون اشتراكاتك وقوائمك.
هاتفي شابك على واي فاي السيارة والنت مش شغّال؟
بعض السيارات بتشبك الهاتف على الواي فاي تبعها وهو بدون إنترنت. JoLink+ بيلاحظ هاد لحاله وبيستعمل بيانات الجوال، فتأكد إنها مفعّلة. وباقي الهاتف واتصال السيارة بيضلوا زي ما هم.
بعد التحديث وقف اللمس أو أزرار الأغاني؟
أحياناً أندرويد بيطفّي إذن «إمكانية الوصول» أو «الوصول للإشعارات» للتطبيقات اللي من برّا المتجر لما تتحدّث. إعداداتك بالتطبيق ما بتتغيّر: افتح JoLink+ واكبس على الإذن الناقص، وبيفتحلك صفحته مباشرة تفعّله من جديد.
انقطعت الخدمة، شو بصير باشتراكي؟
بنعوّضك مدة الانقطاع كاملة، أيام بتنضاف على اشتراكك. بس احكيلنا لما تتوقف الخدمة.
بدي أحذف حسابي؟
من التطبيق: «حسابي ← ملفي والخصوصية» ← «احذف حسابي وبياناتي». بينحذف اسمك ورقمك واشتراكك من عنّا فوراً.
صارت معي مشكلة، شو أبعتلكم؟
من التطبيق افتح «حسابي ← المساعدة والدعم ← حالة النظام والتشخيص» وشارك التقرير، واحكيلنا نوع هاتفك وسيارتك. وإحنا بنلحقها.
